أنا مش جايه أقول إن الجواز وحش
أنا جايه أوضح شوية حاجات كتير من الولاد و البنات مش عارفنها
الولد الشايف نفسه و عايش حياته و بيقول جوازإيه أنا كده حر و مرتاح,أحب أعرفك إنك لسه مشفتش الراحه
و البنت الملهوفه عالجواز بقولها أتوكسي يا موكوسه..أصدي يعني متستعجليش أوي على أكبر مسؤليه هتشيليها فحياتك..
حمل(الهو مش بطنك هتتملى شوية هوا و هتتدلعي و تقولي آة يا ضهري تلاقي الناس تتكفي و يعملولك كراسي بشريه عشان ترتاحي..لا يا ماما لا...ده بني آدم هيتخلق جواكي,هيقولك ثانيه واحده كليتك كده شويه و إحتمال معدتك تدايقه فا يبططها كده عشان تبقى مريحه في النوم و لو ضلوعك تعبته هيعد يرفصك فيها كل ما يطولها)
ولاده(ودي أنا هسيبها للأيام تعرفهالك....أهم حاجه إنها هتكفر سيئاتك كلها دعوتك مستجابه يا ستي أبقي أدعي لجوزك يا حنينه ربنا يسعده كمان و كمان)
ما بعد الولاده(النوم ده تنسيه..بس متقلقيش هتوصلي لمرحله مش هتحسي بتعب هتبقي شبه متخدره كده )
ولا المواعين فالأول إيه ده ياي إيه الفي الطبق ده ملوخيه و لازقه كمان !أرمي الطبق ده بسرعه أنا مقدرش أمسكه..بعد كده هيبقى وقت المواعين ده هو الوقت الهادي اللطيف الهتقضيه مع نفسك ولما تخلص تقولي مش كان كل شويه كمان لا لا لا أنا المره الجايه هزود الأطباق شويه دا أنت يا حبيبي هفتان خالص..فينك يا طبق الملوخيه الملزقه..
و لا أنك تغيري للبيبي فالأول طبعا لا مقدرش بعد كده هتبقي فناااااانه.
مالآخر الجواز حلو بس مسؤليه و هموت و أعرف ليه الرجاله هم البيخافوا من الجواز و الستات هم الهيموتوا عليه!!!!!
الراجل هيعيش حياته لما يجوز...تاكل يا حبيبي,طب تحب تشرب حاجه..طب لو مش عجباك البسله فى باميه...معلش أنا بجد أسفه مكوتش القميص بس هكويه حالا!!
فمتفتكروش يا بنات إن الجواز راحه
البوست ده ممكن يكون سد نفس البنات عن الجواز بس معلش البوست الجاي هكلم في عن ا لحاجات الحلوه في الجواز و هحكي عن إبني حبيبي الهيكمل 4 شهور الأحد الجاي إن شاء الله
15 comments:
اولا احب اهنيكى على مولودك الجديد
وربنا يخلهولك
وعقبالى ياااارب
البوست رائع
والبلوج حلو اوى وفكرة حلوة انك تكتبى عن تجربتك عشان نتعلم ونعرف ايه اللى هنشوفه لما نتزوج واد ايه حجم المسؤلية
مع تحياتى
جميل جداً .. بس بما اني ولد فلازم ارد بقى لحسن كدا انا حسيت اني انا الملك المتوج اللي مش عاجبه حاجه !! انتي شايفه كدا ؟! هو كلامك كويس وفي شئ من الصح بس دا على اساس ان الستات زي ما بتقولي " اطبخلك ايه يا حبيبي .. باميه ولا بسله .." والله لو كدا يبقى عندك حق لكن لو .. " قوم يا خويا هات لنا عيش .. وابقى تعالى كدا ساعدني في البيت انت مش لسه سامع الشيخ بيقول ان الراجل لازم يساعد مراته ..." وناهيك عن محاضرات الإلتزام و الإتيكيت وطبعاً الراجل حاجه من الاتنين يا بينفجر فيها يا اما بيتغلب على امره ويعديها .
مبروك علي البيبي أولاً وربنا يسعدك بيه يارب
انتي عندك حق مش عارفة ليه الرجالة بتهرب بصحيح من الجواز رغم انهم مابيتعبوش في حاجة .. بالعكس بيتجوز واحدة وفي نفس الوقت خدامة تشوف طلباته كلها
دي الزوجة بتدلع زوجها وتريحه اكتر من أمه
يعني عندك انا مثلاً
جوزي قبل الجواز كان ينضف البيت مع مامته ويسخن أكله بنفسه لما يرجع من شغله وهدومه كان بيغسلها بنفسه
دلوقتي
مايعرفش يفتح التلاجة ويطلع حتة جبنة ياكلها لازم الخدامة اللي هي انا اللي تجيبهاله
ابقي تعالي زوريني
ولو احتجتي اي معلومة عن الأطفال أبقي أسأليني مايهمكيش
احنا أخوات
مبروك البلوج إللى أكتر من رائع واهو بيعرفنا وجهة النظر الأخرى فينا نحن معشر الرجال, بس جايلى إحساس من الردود إنه هيكون مخرج لكل العقد النفسيه إللى كل واحده حاساها من جوزها الطيب الحنون المأنتخ
قطيعة تقطع الجواز على الرجالة والكل كليلة
بقى الولادة والخلفة كمان نيلة...ده ايه الهم ده يا ربي
يعني مفيش نفسي في المانجة يا حبيبي في شهر يناير يقوم عينيه تنط من وشة و ايديه تترعش من الفرحة...و يفط من السرير جري عشان ينزل على مترو ماركت يمسح قسم الفواكه لحد ما يجيبلي كيلو مانجة بالشئ الفلاني عشان الواد ما تتطلعش في وشة حباية
قال وانا الي كنت فاكرة نفسي هتهني
شوفي يا (متفتكروش) يا ختي...على رأي المثل...جتها نيلة الي عايزة خلف
الف مبروك على المدونة الجديدة ويجعله عامر بحسك دايما...,اهي حاجة تضحكنا شوية بدل مسلسل الغم الي كره الواحد ف العيشة ده
بوست اكتر من رائع ينبئ بمولد مدونة من العيار الثقيل....احترسوا يا سيبرية
تحياتي الخالصة
مالآخر الجواز حلو بس مسؤليه و هموت و أعرف ليه الرجاله هم البيخافوا من الجواز و الستات هم الهيموتوا عليه!!!!!
الراجل هيعيش حياته لما يجوز...تاكل يا حبيبي,طب تحب تشرب حاجه..طب لو مش عجباك البسله فى باميه...معلش أنا بجد أسفه مكوتش القميص بس هكويه حالا!!
:::::::::::::::::::::::::::
والله يا بنتى انا كمان هموت وأعرف بجد
البنات دى اصلا مخها طاقق
وفاكرين نفسهم هيعيشوا لاف ستورى محصلتش بعد الجواز
مش هيتحولوا لمجرد هوم سيرفس وبيبيى سيتر
بس برضه الحمد لله
الجنة تحت اقدام الامهات
بالعند فيكوا يا رجالة
هههههههههههههههههههههه
تحياتى يا قمر
ألف مبروك عالبيبى الجديد .. ربنا يباركلك فيه ويفرحك بيه
لكِ تحيتى
سالى
lightmoon
والله أنا قولت أحكي شويه عشان البنات تتنصح شويه..بس واضح إنهم ولا هيتنصحوا ولا حاجه من عقبالي ياااارب بتاعتك دي :D
عبد من عباد الله
هو أنت كمان مش عايز تجيب عيش
شايفين ي بنات
متبقوش ترجعوا تعيطوا
اللأخت مفقوعه
أنا كان عندي سؤال..إزاي تخلي البيبي يقول عايزك أنت يا بابا؟؟
أبو علي
أنا يشرفني إنك تعرف وجةالنظر الآخرى..عالله ييجي بفايده يا رب
سكوت باشا
أحب أقولك إني كنت هاموت على مانجايه بس بصراحه مكنش وقتها بس الراجل متأخرش و جابلي عصير
أم دودو
أيوه..دي دنيا غروره و غداره,إحنا الكسبانين في الآخره,و الصبر حميل
اللهم أفرغ علينا صبرا
نورتوني يا جماعه
اولا : مبروك علي المولود .. يتريب في عزو
ثانيا : الرجالة بتهرب من الجواز لأنه مسؤلية كبيرة بيت مفتوح وست وأولاد
ومصاريف كل الحاجات دي انت ملزم بيها
اما ان الست بتريح جوزها اكتر من امه فدي فيه اكلام وانت عازب انت حر طليق تفعل ماتشاء وقت ماتشاء ماحدش بيقولك حاجة تسافر مع اصحابك تتأخر برة براحتك حتي لما مامتك تتضايق من تأخيرك بكلمة حلوة في نص دقيقة الحورا بينتهي لكن مع الزوجة صعب قوي والحوار الصغير بيكبر
كمان في بيت والدك مامتك شايلاك علي كفوف الراحة بتعملك الأكل اللي تحبه وتغسلك هدومك واختك تكويهالك وممكن بكلمة حنية تلمعلك الجزمة كمان
لكن مع الزوجة صعب قوي او مش كل الستات بتعمل كدة
يعني لو قلتها اكويلي القميص عادي قوي تقولك انا مش خدامة عندك
او مانا لسة خارجة من المطبخ خلي عندك دم اوفي حالة زي حالتك انت مش شايف اني شايلة الواد
في بيت والدك انت بتدلع اكتر وحر اكتر ومستمتع بحياتك اكتر
لكن بردة الجواز ماحدش يقدر يستغني عنه
عذرا للأطالة لكن انت سألتي فقلت اجاوب
عارفة انا كنت بأعمل ايه ؟
كنت مش بشيل الولاد وهما بيبيهات كتييير ... وخصوصاً قبل وصول باباهم من الشغل ... المهم بابا طبعاً بيرجع من الشغل وبيبقي العيال واحشينه يشيل هو بقي وبالهنا والشفا
فالولاد عرفوا ان بابا للشيل لكن ماما لأة ...ودمتم
تصدقي ... فكرتيني كان بيشيلهم اذاي ... اصل انا جوزي قاسي شوية مع الولاد لكن وهما أطفال رضع كان بيتعامل معاهم بمنتهي الحنية
وكنت بأحب اتفرج عليه وهو شايلهم وبينيمهم
هو حتي عاوز بيبي تالت ... لكنانا اللي بأربي لوحدي .. والحكاية متعبة أوي
هاى
بوست رائع
يا ريتك كتبتيه قبل ما اتجوز بس للأسف جه متاخر بعد ما خلفت مرتين
ههههههههههه تتعوض
مبروك على الجواز
والف مبروك على المولود
ومبروك علينا احنا المدونة الجديدة دي
احب اعرفك بنفسي
اختك شاهي مدوباهم تلاتة
قصدي مخلفة تلاتة
اهلا بيكي في عالم الأمومة ....الحديثة
تحياتي
الله الله دا بلوج دا ولا وكر ستات وكمان بتشتم فيه لا لا البتاع دا باينه حيضرب صاروخين كدا وانا مش مسئول عن اي خسائر بشريه ....... وبعدين شوف الرد الجميل " هو انت كمان مش عايز تجيب عيش !! " الجمله دي لوحدها تكفي لخراب بيت ( طبعاً مع مراعاه التكشيره و الحاجب المرفوع و زغرة العين ) لا انا فعلاً شكلى حلغي فكره الجواز دي واقضيها صيام و بعدين دلوقتي احنا بقينا عمله نادره يا شباب يعني كل واحد يحاسب على نفسه لا يتخطف ... مفهوم قصدي طبعاً مش كدا ؟؟
ههههههههههههههههههههه
هههههههههههههههههههههههههههههههههه
ههههههههههههههههههههههههههههههههههه
والله بتصعبو عليا
ههههههههههههههههههههههههه
كنت بقلب في مدونتي...لقيت تعليق ليكي...قلت اجي اشقر واطل....لقيتك زيي بقالك مدة ما كتبتيش....ما تغيبيش كده...ليكي جمهور محتاج يتابعك
Post a Comment